Kenging Bah Yatno
BEBAS. Rek asup ka sakola mana wae oge, mangga. Ngan, sok angger aya tata carana. Unggal sakola boga aturan nu tangtu.
Mun urang apal taun tukang misilna, salian ti niley teh geuning aya hal sejen saperti zona. Urang imah di mana, sarta deukeut ka kampus mana? Aya deui nu make sarat prestasi khusus kayaning seni atawa olahraga.
Genah keur budak pinter bari dirojong ku kolot mah. Ngan tempo keuna ka nu sejen sok aya we nu humandeuar bari ngangluh.
Sakapeung sok manggihan kahanjelu batur. Nya kitu, teu ngeunah alatan sarat teu nyumponan pangpangna mah. Atuh, muih neangan sakola nu daek narima.
Loba budak kapaksa asup ka sakola nu teu pas jeung harepanna. Aya deui anu kaitung asal sakola. Rea eta teh.
Jadi kudu kumaha?
Nyeta bebas sakola mah. Tapi mun nyanghareupan aturan bet teu gampang geuning. Antukna tadi, asal tea we.
Keun, najan maksa ge lain pihadeeun. Mending milih nu pas bae jeung kaayaan. Tong maksakeun.
Sabenerna di mana bae oge sarua. Unggulan atawa biasa, da sakola keneh. Anu karunya mah sakola nu kurang pisan, nu daptarna ngan saeutik.
Ah, ketang, siap we nyiar elmu ku niat nu bener. Ulah dapon asup make cara teu bener. Bisi matak ka hareupna. Katulah keh.
Aya nu kitu? Ih, sok aya nu maksa tea alatan gengsi. Tah, ieu nu teu bener. Atawa abong kena anu.
Hese ketang. Dina emprona mah aya bae nu ngarumpak aturan. Komo deui tadi rasa maneh boga duit.
Eta teh pangalaman tatangga beh ditu. Sugan ayeuna mah robah tur leuwih ngarti.
Mending keneh sakola nu deukeut ka panganjrekan ngarah katalingakeun ku kolot. Malah teu keuna ku macet mun sakola normal. Geuning usum korona mah, sarua we daring.
Sakali deui, milih sakola teu bisa sakarep ingsun. Sabab aya aturan bari teu kudu maksakeun lantaran gengsi. Teu, teu kudu.
Batur mah rea keneh nu can bisa sakola. Sok anggur tulungan batan ngudag gengsi mah.
Hayu…
Hayu ka mana?
Enya sarakola. Sugan ari resep nyiar elmu mah jadi ngarti mana bener mana nu salah. Teu resep ngarunpak aturan tur daek silih tulungan.
Hayu…
Eta hayu deui bae. Rek ka mana atuh?
Sugan aya balad nu bisa mere conto bener. Sugan aya batur nu tuhu kana aturan narimakeun kana kadar. Bari teu maksakeun, kaasup milih sakola.
Sugan….
Hayu deui?
Ih, bener urang silih elingan we, da kana kahadean perelu ngajak. Bisi dulur salah lengkah, piraku urang rek antepan.
Enya, hayu…
Pilih sakola nu bisa beunang elmuna. Lain meunang ijasah wungkul bari ngagugu emisi, gengsi.
Saha nu kudu ngamimitian bener?
Anu apal aturan!***
Bah Yatno, lulusan Jurusan Basa & Sastra Sunda FPBS IKIP (UPI) Bandung. Bumen-bumen di Cihideung, Parongpong, Bandung Barat bari ngokolakeun Yayasan Insan Basajan.
