KALAKAY GUPAY
Hoyong nemonan salira
Ngoconan kecap ku pangogo
Ngalendean wanci
Bari sakali-kalieun milah-milah polah
Tuluy diuntun jadi warnaning kembang
mangle sinangling asparagus
Gelar mapaes andonkeuneun urang tepang
Ngarenghap bareng sadami-sadami
Dami unggal dami urang etang
Anu boa teu patos engeuh
Dami unggal dami urang cuntang
Jadi sabagian babasan katresna
Renghap baluas patingjaraul
sabada urang anjog
Di hambalan rumpaka
Padahal urang teu terang
Saha anu bakal kungsi datang nemonan
Ngagalindengkeun sakalimah kanyaah
Dibangbalerkeun ku kalakay gupay
***
Dra. Tiktik Kartika, M.M., Praktisi Pendidikan Kabupaten Bandung Barat, Purna Bakti Guru Basa Sunda.
